د يوسف عليه السلام مستند ژوند او د يوسف سورت جالبي نکتې ( د يوسف سورت د اووم او اتم نمبرآياتونو ترجمه، تفسير او جالبي نکتې)

د يوسف عليه السلام او د هغه د وروڼو په قصه کي جالبي نکتې سته، چي الله تعالی ئې دلته د آيات په لفظ سره معرفي کوي.

 

لَّقَدْ كَانَ فِي يُوسُفَ وَإِخْوَتِهِ آيَاتٌ لِّلسَّائِلِينَ ﴿يوسف: ۷﴾.

ژباړه: بيله شکه په يوسف او د هغه په وروڼو کي د پوښتني کوونکو لپاره نښي سته.

د يوسف عليه السلام او د هغه د وروڼو په قصه کي د پوښتني کوونکو او حتی ټول انسانيت لپاره د هدايت او عبرت داسي درسونه سته، چي د الله تعالی پر ستر قدرت، عظيم حکمت، انتقام، لطف او غوره انتخاب باندي دلالت کوي، هوښياران به داسي عبرت ځني واخلي، چي د ستونزو پر وخت به د الله تعالی سره خپلي اړيکي قطع نکړي، صبر به وکړي او د هغې موقع لپاره به منتظر سي، چي رب العالمين د هغه د ستونزو نتيجې ته ټاکلې ده.

إِذْ قَالُوا لَيُوسُفُ وَأَخُوهُ أَحَبُّ إِلَى أَبِينَا مِنَّا وَنَحْنُ عُصْبَةٌ إِنَّ أَبَانَا لَفِي ضَلَالٍ مُبِينٍ ﴿يوسف: ۸﴾.

ژباړه: او ور ياد کړه، هغه وخت کله چي د يوسف عليه السلام وروڼو وويل، چي واقعيت دادی، چي په موږ ( ټولو) کي يوسف عليه السلام او د هغه ورور زموږ پلار ته ډير خوښ دی، پداسي حال کي چي موږ زيات يو، بيله شکه زموږ پلار پدغه کار سره په ښکاره خطا کي دی.

د يوسف عليه السلام ناسکه لسو وروڼو پخپل منځ کي مجلس سره وکړ، چي پر پلار باندي زموږ په نسبت يوسف عليه السلام او د هغه سکه ورور بنيامين زيات ګران دي، پداسي حال کي چي موږ غټ جماعت يو او د پلار اکثره چاري موږ مخته وړو، نو پدغه تعامل کي زموږ پلار خطاوتلی دی، يعني که موږ ته د خدمت په خاطر ترجيح نه راکوي، نو هغوی ته دي هم ترجيح نه ورکوي.

دوی حسد ړانده کړې وه او پدې نپوهيدل، چي يوسف عليه السلام او د هغه سکه ورور تر دوی کشران دي، يو خو د کور او بهر په چارو کي زياته ونډه نسي اخيستلای او بله دا چي دوی لسو وروڼو هم د ماشومتوب او ناز دورې تيري کړي دي؛ ځکه ماشومان د لويانو په نسبت زيات ناز او توجه ته ضرورت لري.

(۸) نکته: حسد انسان ړندوي او د تدبير قوه ئې داسي له منځه وړي، چي د وخت غوښتني او تقاضاوي نسي درک کولای، لکه دلته چي د يوسف عليه السلام وروڼه پدې نپوهيږي، چي يوسف عليه السلام او د هغه ورور ماشومان دي او بايد ونازول سي.