شل ډير ستر نعمتونه

 

په ژوند کي شل ډير ستر نعمتونه:

1.    صالحه عقیده —  د الله تعالی پر توحید او د رسول الله پر رسالت باندي صحيح ايمان؛

2.    صالح نیت —  د مشروعو کارونو لپاره پاک او د الله تعالی د رضا نیت لرل؛

3.    صالح عمل — د الله تعالی داسي عبادت، چي د رسول الله د عمل او لارښوونو سره برابر وي؛

4.    صالح علم —  هغه علم چي انسان حق په وپيژني، عمل په وکړي، خلکو ته ئې ورسوي او خدمت په وکړي؛

5.    صالحه مېرمن —  دينداره، بااخلاقه د ژوند ملګرې؛

6.    صالح اولاد —  داسي اولاد، چي د والدینو لپاره د دنیا او آخرت خیر وي او والدينو ته دعاوي کوي؛

7.    صالح رفیق —  داسي ملګری، چي انسان خیر ته هڅوي، له ضرر څخه ئې ژغوري او ورسره اړيکي د الله تعالی د دوستۍ سبب وي؛

8.    صالح استاد —  داسي استاد چي ښه علم، اخلاق او عمل ولري او خپلو زده کوونکو ته د اولادونو په سترګه ګوري؛

9.    صالح ګاونډیان —  د خیر، امانت او ښه چلند خاوندان وي او نور ئې له ضرره په امن وي؛

10. صالحه کورنۍ —  داسي کورنۍ چي د دین، محبت او اخلاقو لرونکې وي او په دنيا او آخرت کي سترګي په لوړي وي؛

11. صالح مشاور—  داسي مشاور، چي د مشورې پر وخت د امانت او صداقت تر څنګ خيرخواه هم وي؛

12. صالح دوستان — داسي دوستان، چي په پرمختګ مو خوښيږي او د ضرر پر وخت ډاډ او همکاري کوي؛

13. صالح مال —  حلال رزق چي د خیر په لاره کي مصرفيږي؛

14. صالح کسب —  حلاله او ګټوره دنده یا تجارت؛

15. صالح چاپېریال — داسي ماحول چي انسان له ګناه څخه ساتي او نيکۍ ته ېې هڅوي؛

16. صالحه وینا —  رښتیني، نرمي او  داسي ګټوري خبري، چي عمل په سوی وي؛

17. صالح اخلاق —  صبر، تواضع، عفو، امانت او حُسنِ معاشرت؛

18. صالحه ټولنه —  له داسي خلکو سره اړیکي، چي د خیر په کارونو کي يو د بل مرسته کوي او له ناوړو کړنو څخه يو بل منع کوي؛

19. صالح هدف —  په ژوند کي داسي موخي لرل، چي دنیا او آخرت دواړه آبادولای سي؛

20. صالحه پایله/حسن خاتمه —  داسي ژوند کول، چي د انسان ژوند په ایمان او نيکو اعمالو پای ته ورسوي.